लय समाउँदै पाँचथर अस्पताल, भित्रिए ४ विशेषज्ञ

जीवन गाैतम
२१ पौष, २०७९

रेफर मात्रै हुने भनेर आलोचना भइरहने पाँचथर अस्पतालमा सेवा सुरधारको संकेत देखिएको छ । अस्पताल ब्यवस्थापन समितिले एकै पटक ४ बिशेषज्ञ डाक्टर भित्राएर सेवा सुरु गरेपछि स्थानीयले राहत पाएका छन । डाक्टर भित्राइएको र सेवा सुधारको थालनी भएको बारे अस्पताल ब्यवस्थापन समितिले पत्रकार सम्मेलन गर्दै जानकारी गराएको छ ।

पछिल्लो पटक हाडजोनी तथा नसा रोग, जनरल सर्जन र एनएसथेसियाका ४ डाक्टरलाई अस्पतालले सेवामा लिएको हो । दक्ष जनशक्ती आएपछि यो एक साता बिचमा दैनिक जसो अपरेशन सेवा भइरहेका छन ।

यस अघि पाँचथर अस्पतालमा नभएका हाइड्रोसिल, फिस्टुला, हर्नीया, पत्ति थैलिको अपरेसन, स्टिल राख्ने झिक्ने सम्बन्धी अपरेसन सेवा सुरु भएका हुन ।

ब्यवस्थापन तत्कालै बालरोग बिशेषज्ञ भित्राउने तयारीमा लागेको छ । ५० शैयाको अस्पताल बिस्तारको चरणमा रहेको अस्पतालको भौतिक संरचना भने पर्याप्त छ तर सेवा नभएको भन्दै गुनासो हुने गरेको थियो ।